РАЗВОЈ НА ЗАЕДНИЧКИОТ РЕГИОНАЛЕН ПАЗАР – „ЗЕЛЕНИТЕ КОРИДОРИ“ НА ЦЕФТА ЌЕ БИДАТ ПРОШИРЕНИ КОН ГРЦИЈА

Директорот на Секретаријатот на ЦЕФТА Емир Џикиќ истакна дека ЦЕФТА, заедно со своите партнери, вложува големи напори да ја реализира идејата за Заедничкиот регионален пазар, како и да ги спроведе клучните активности од Акцискиот план за заеднички регионален пазар, што е можно побрзо во корист на граѓаните и компаниите.

Кога ги сумиравме резултатите од 2020 година, кои донесоа многу предизвици, би можеле да кажеме дека ЦЕФТА ја олесни трговијата во овие тешки времиња, како и да ветиме дека таа ќе остане наш приоритет во 2021 година – изјави Џикиќ.

Работиме на различни процеси, што би им заштедило на компаниите време и трошоци – додаде тој, споменувајќи го проширувањето на „зелените коридори“ во рамките на ЦЕФТА и со ЕУ, олеснување на е-трговијата и валидација на програмите на АЕО.

Направена е значителна работа на експертско ниво и сега усвојувањето на овие важни одлуки треба да биде приоритет, рече Џикиќ на Самитот за Западен Балкан во Берлин (Самит на Западен Балкан), одржан на 5 јули 2021 година.

„Зелените коридори“ на ЦЕФТА се проширени на сите премини во регионот, вклучително и на железничките премини, а тие коридори ќе бидат проширени и кон Грција, како што најави премиерот на Грција Кирјакос Мицотакис на Самитот во Берлин.

Статистичките податоци покажуваат дека приближно 80% од камионите користат ЦЕФТА „зелени коридори“, а 20% од оние кои ги користат превезуваат добра од приоритетна потреба и ги остваруваат придобивките од приоритетното поминување.

Извештаите за валидација на АЕО програмите за Северна Македонија, Србија и Молдавија се завршени и подготвени се за усвојување, а станува збор за царинските управи кои се согласиле да ги признаат валидираните АЕО програми издадени на еден пазар на другите шест пазари.

Овој статус овозможува полесно царинење воопшто и е клучен елемент во зајакнувањето на безбедноста на синџирот на снабдување, обезбедувајќи повеќе придобивки за трговијата.

Одлуката за олеснување на е-трговијата, која ги утврдува правилата за е-трговија според ЦЕФТА, е финализирана и со усвојување на заеднички принцип на пазарот и усогласување на клучните правила, на компаниите им се обезбедува збир на правила за седум пазари, се наведува во изјавата на ЦЕФТА.

Преговорите за професионални квалификации на експертско ниво се завршени, а постигнат е значителен напредок во преговорите за решавање на спорови и отстранување на работните дозволи и туристичките услуги, се додава во изјавата.