НАЈДОЛГАТА ЖЕЛЕЗНИЧКА ЛИНИЈА ВО СВЕТОТ ОД ЛИСАБОН ДО САЈГОН СО ВОЗ

Има нешто навистина посебно и неизмерно романтично во патувањето со воз. Обично велат дека станува збор за авантура што останува во сеќавањата и ве враќа во некое друго време. Самото тоа да се биде во воз ќе ви даде искуство за сосема поинакво патување. Покрај вас, се менуваат убави сцени со незаборавни пејсажи, наизменично додека уживате со чаша пијалок и замислено ги набљудувате, како да патуваат со вас.

Поттикнати од вчерашниот податок за најдолгата железничка линија во светот по која непрекинато можете да се возите со воз што започнува од Лисабон во Португалија, а завршува во Сајгон, денешен Хо Ши Мин во Виетнам решивме барем преку текст и слики да ја почуствуваме оваа авантура и да дознаеме и други податоци во врска со ова патување.

Патувањето вкупно би траело 14 дена и би чинело околу 2.100 евра во еден правец, а ќе се поминат 17 034 километри преку 10 држави.

Да започнеме по ред, тргнуваме навечер од Лисабон, од железничката станица Лисабон Ориент со ноќниот воз до Мадрид, а од Мадрид го продолжуваме патувањето кон Барселона и Париз.

Од Париз до Москва секојдневно сообраќа вагон за спиење во сопственост на Руските железници. Поаѓањето на возот е од железничката станица Париз Ест во 18:57 ч.

Во Москва пристигнувањето е во четвртиот ден од ова патување започнато од Лисабон. За да го продолжиме истиот ден патувањето кон Пекинг, треба да сме во Москва среда или сабота кога тргнува возот за Кина. Ова е најдолгата релација што ќе се помине со еден воз. Инаку со возот ќе се помине покрај Бајкалското Езеро, односно сообраќа преку транс-сибирската магистрала, при што возот ќе ја напушти истата магистрала веднаш после Иркутск за да се упати кон Улан Батор во Монголија и од таму за Пекинг.

Наредното патување започнува на десетиот ден од железничката станица Пекинг Запад за Ханој, Виетнам. Исто така на оваа релација возовите сообраќаат два пати неделно поминувајќи за 3 дена нешто помалку од 2 800 километри.

После две недели се пристигнува на целта, Сајгон, Виетнам поминувајќи 9 временски зони за 2 волшебни недели. На ова „патување“ се менуваат седум возови, а железничката пруга преку европските престолнини, Лисабон, Мадрид, Париз, Берлин, Варшава и Москва, не води низ сибирската тајга и тревните степи на Монголија до Пекинг, а после и до прекрасниот Виетнам.

Секако целата маршрута не е изводлива за нас, но патувањето од Скопје до Лисабон може да биде авантура, а до Виетнам, вистински предизвик преку Турција и Иран. За овие патувања ќе пишуваме во наредниот период.