НОВАТА АКВИЗИЦИЈА НА ДАНСКИОТ ГИГАНТ MAERSK

Водечката светска бродска компанија Maersk постигна договор да ја купи логистичката компанија LF Logistics со седиште во Хонг Конг за 3,6 милијарди долари, со што успешно ќе продолжи со аквизиции кои вклучуваат компании за е-трговија, шпедиции, како и помали конкурентски компании.

Со планираната аквизиција, Maersk ќе додаде 223 складишта на постојното портфолио, а ќе има вкупно 549 капацитети на глобално ниво, со вкупна површина од 9,5 милиони квадратни метри.

Аквизицијата дополнително ќе ги зајакне способностите на Maersk како интегрирана логистичка контејнерска компанија, која може да им понуди на клиентите глобални решенија од почеток до крај во синџирот на снабдување, се вели во соопштението на компанијата.

LF Logistics е специјализирана за B2B и B2C решенија за дистрибуција во малопродажба, големопродажба и е-трговија. Обезбедува копнени логистички услуги, како што се складирање и транспорт низ Азија, на повеќе од 250 глобални клиенти. Развиените односи со клиентите и оперативната извонредност на компанијата обезбедуваат силна основа за проширување на Maersk во Азија и Пацификот.

Maersk ќе ја купи LF Logistics од мнозинскиот акционер Li & Fung и државниот инвеститор со седиште во Сингапур, Temasek, кој купи 22% од акциите во компанијата во 2019 година. Стекнувањето се очекува да биде завршено во 2022 година.

Извор: www.maersk.com